ߖߌ߬ߣߍ߬ ߟߊ߫ ߘߍߒߖߘߍߟߦߊ ߛߊ߲߬ߞߎ߲߬ߓߍ߲ ߆߈߲ ߢߊ߰ߢߊ߮: ߒߞߏ ߝߘߏ߬ߓߊ߬ ߞߙߏߝߏ ߓߘߊ߫ ߞߎ߲߬ߠߊ߬ߛߌ߮ ߘߊߟߌ߫ ߝߊ߬ߛߏ߬ ߞߊ߲ ߠߎ߬ ߞߊ߬ߙߊ߲߬ ߞߏ ߟߊ߫

߂߀߂߆ ߞߏ߲ߓߌߕߌ߮ ߕߋ߬ߟߋ߫ ߂ ߟߋ߬ ߡߊ߬߸ ߒߞߏ ߝߘߏ߬ߓߊ߬ ߞߙߏߝߏ ߛߌ߲߬ߝߏ߲ ߠߎ߬ ߞߵߊ߬ߟߎ߬ ߟߊߘߍ߬ ߞߐߣߊߞߙߌ߫߸ ߡߎߛߊ߫ ߓߊߟߊ߲ߘߎ߯ ߖߊߟߏ߫ ߟߊ߫ ߞߎ߲߬ߠߊ߬ߛߌ߰ߟߌ ߞߣߐߡߊ߬߸ ߞߊ߬ ߟߊ߬ߛߋ߬ߟߌ߬ ߞߟߊߒߞߋ߫ ߞߍ߫ ߖߌ߬ߣߍ߬ ߟߊ߫ ߘߍ߲ߒߖߘߍߟߦߊ ߢߊ߰ߢߊ߮ ߓߍ߲߬ߒ߬ߛߋ߲߬ߡߊ ߝߍ߬.

ߝߘߏ߬ߓߊ߬ ߞߙߏߝߏ ߛߐ߲߬ ߘߴߊ߬ ߡߊ߬ ߝߛߊߦߌ߫߸ ߞߏ߫ ߖߌ߬ߣߍ߬ ߟߊ߫ ߓߘߍ߬ߓߘߍ߬ߟߌ ߘߍߒߖߘߍߟߦߊ ߦߴߊ߬ ߓߟߏ߫، ߞߏ߬ߣߌ߲߬߸ ߣߴߊ߬ ߦߴߊ߬ ߝߍ߬ ߞߵߏ߬ ߘߝߊ߫߸ ߝߏ߫ ߊ߬ ߦߋ߫ ߟߐ߲ߠߌ߲ߦߊ ߣߌ߫ ߞߊ߲ ߠߊ߫ ߖߘߍ߬ߕߌ߰ߦߊ ߟߋ߬ ߝߊ߬ߙߊ߫ ߏ߬ ߞߊ߲߬، ߊ߬ߟߎ߬ ߞߎߡߊ߫ ߘߴߊ߬ߟߎ߫ ߞߎ߲߬ߠߊ߬ߦߋ߬ߙߋ߲߬ ߞߏ ߞߊ߲߬߸ ߣߊߟߌ߬ߡߎ߲߫ << ߘߍ߲ߒߖߘߍߟߦߊ߫ ߝߌ߬ߟߊ߬ߣߍ߲>> ߘߌ߫، ߞߊ߬ߕߎ߲߯߸ ߘߍߒߖߘߍߟߦߊ ߡߍ߲ ߛߐ߬ߘߐ߲߬ ߘߊ߫ ߁߉߅߈ ߠߊ߫ ߛߋߞߎ߫ ߕߎ߬ߙߋ߬ ߟߊ߫ ߖߛߎ߬ߟߊ߬ߕߍ߮ ߞߏߛߐ߲߬߸ ߏ߬ ߦߋ߫ ߓߘߍ߬ߓߘߍ߬ߟߌ ߘߍ߲ߒߖߘߍߟߦߊ ߟߋ߬ ߘߌ߫، ߞߵߊ߬ ߛߐ߬ߘߐ߲߬ ߁߉߄߉ ߟߋ߬ ߟߊ߫߸ ߖߌ߬ߣߍ߫ ߞߊ߬ ߞߊ߲ ߣߌ߫ ߟߐ߲ߠߌ߲ߦߊ ߘߍ߲ߒߖߘߍߟߦߊ ߛߐ߬ߘߐ߲߬߸ ߒߞߏ ߛߓߍߛߎ߲ ߛߌ߲ߘߌ ߞߏߛߐ߲߬ ߛߟߏ߬ߡߣߊ߬ ߞߊ߲ߕߍ߫ ߓߟߏ߫، ߊ߬ߟߎ߫ ߞߊ߬ ߒߞߏ ߟߋ߬ ߘߊ߲ߞߎ߲߫ <<ߞߊ߲ߠߊߓߌߟߊ ߝߙߋߞߋ ߝߎߟߋ߲ߓߊ߮>> ߘߌ߫.

ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫: << ߘߍ߲ߒߖߘߍߟߦߊ ߥߟߏߒߘߐ ߦߋ߫ ߞߊ߲ߠߊߓߌߟߊߟߌ ߣߌ߫ ߖߘߍ߬ߕߌ߰ߦߊ ߡߍ߲ ߘߌ߫ ߸ ߏ߬ ߟߎ߫ ߟߋ߬ ߖߡߊ߬ߣߊ ߞߊ߲ߠߊߓߌ߬ߟߊ߬ ߟߊ߫ ߖߋ߬ߓߌ߬ߦߊ߬ߟߌ߬ ߞߏߟߌߞߏߟߌ ߘߐ߫ ߞߵߊ߬ ߟߊ߫ ߛߏ߬ߙߌ߬ߡߊ߬ߘߋ߲߬ ߝߊ߲ߞߊ ߛߌ߲߬ߝߏ߲߬ߧߊ߫ ߊ߬ ߖߘߍ߬ ߕߊ߫ ߜߋ߲߬ ߘߐ߫ ߸ ߞߵߊ߬ ߟߊ߫ ߘߎ߰ߞߘߐ߬ ߣߊ߲ߝߟߏ ߟߎ߫ ߕߣߐ߬ߓߐ߫ ߖߘߍ߬ߕߌ߰ߦߊ ߘߐ߫ ߸ ߊ߬ ߣߌ߫ ߞߵߊ߬ ߟߊ߫ ߟߞߊ߬ߙߊ߲߬ߠߌ߲ ߢߍߥߟߊ ߟߊߘߊ߲߫ ߞߵߊ߬ ߓߟߏߦߴߊ߬ ߖߘߍ߬ ߕߊ߫ ߜߋ߲߬ ߘߐ߫ ߸ ߊ߬ ߣߴߏ߬ ߢߐ߲߰ߘߐ ߟߎ߬.>> ߏ߬ ߟߎ߫ ߊ߬ߟߎ ߢߣߊ߫ ߖߘߍ߬ߕߌ߰ߦߊ ߘߝߊߣߍ߲ ߘߌ߫.

ߒߞߏ ߝߘߏ߬ߓߊ߬ ߞߙߝߏ ߞߵߊ߬ ߟߊ߫ ߓߋߟߋ߲ߠߊ ߦߙߐ ߏ߬ ߟߊߕߎ߲߰ ߞߎߡߦߊߛߋ߲߫ ߝߊߘߌ߫ ߜߘߍ߫ ߟߊ߫ ߌߞߐ߫߸ ߞߏ߫:

<<ߘߐ߬ߝߐ ߝߛߍ߬ߝߛߍ߬ߟߌ ߞߣߐߡߊ߬ ߸ ߖߡߊ߬ߣߊ߬ ߥߙߎߞߌߣߍ߲ߓߊ ߓߍ߯ ߞߵߊ߬ ߟߊ߫ ߘߍ߲ߖߘߍߟߦߊ ߓߍ߲߬ߛߋ߲߬ߡߊ ߕߣߐ߬ߓߐ߫ ߟߋ߬ ߞߊ߬ ߖߘߍ߬ߞߊ߲߬ ߞߊߙߊ߲ ߞߍ߫ ߖߘߍ߬ߕߌ߰ߦߊ ߛߡߊ߬ߛߋ߲߬ ߝߟߐ ߘߌ߫. ߏ߬ ߞߍ ߸ ߊ߬ߟߎ߫ ߞߊ߬ ߡߌ߬ߘߊ߬ ߢߊ߫ ߛߐ߬ߘߐ߲߬ ߥߙߎߞߌ ߡߊ߬ߘߎ߮ ߕߐ߭ ߓߍ߯ ߡߊ߬.>> ߓߊ߲ߘߎ߯ ߞߵߏ߬ ߝߐ߫ ߖߌ߬ߦߊ߬ߖߟߎ ߢߌ߲߬ ߘߐ߫.

ߒߞߏ ߝߘߏ߬ߓߊ߬ ߞߙߏߝߏ ߞߵߊ߬ߟߎ߬ ߟߊ߫ ߛߍߥߊ ߖߍ߬ߘߍߖߍ߬ߘߍ ߝߣߊ߫ ߦߌ߬ߘߊ߬߸ ߞߊ߬ ߓߍ߲߬ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲ ߡߊ߬ ߖߡߊ߬ߣߊ ߛߌ߲߬ߝߏ߲߬ߘߊ ߘߏ߫ ߟߎ߫ ߓߟߏ߫߸ ߊ߬ ߣߌ߫ ߖߡߊ߬ߣߊ ߛߊ߬ߙߌ߬ߦߊ߬ ߛߓߍ ߖߍ߬ߘߍ ߓߟߏ߫، ߊ߬ߟߎ߫ ߞߵߊ߬ ߦߌ߬ߘߊ߫ ߏ߬ ߟߋ ߦߙߐ ߘߐ߫ ߞߏ߫ ߘߏ߫ ߞߊ߫ ߞߊ߲߫ ߞߊ߬ ߟߊ߫ ߞߏ ߟߎ߬ ߥߊ߫ ߢߊ ߞߊ߲߬ ߡߎߣߎ߲߬߸ ߤߊ߲߯ ߞߊ߬ ߝߊ߬ߛߏ߬ ߞߊ߲ ߠߎ߬ ߟߊߘߏ߲߬ ߟߞߊ߬ߙߊ߲߬ߠߌ߲ ߢߍߥߟߊ ߘߐ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬.

ߡߎߛߊ߫ ߓߊߟߊ߲ߘߎ߯ ߖߊߟߏ߫ ߟߊ߫ ߝߐߟߌ߫ ߘߐ߫߸ << ߒߞߏ ߝߘߏ߬ߓߊ߬ ߞߙߏߝߏ ߓߘߊ߫ ߓߊ߲߫ ߞߊ߬ߙߊ߲ ߛߊ߯ߘߊ߫ ߝߟߐ ߢߍߥߟߊ ߘߟߊߡߌ߬ߘߊ߬ ߟߊ߫.>> ߊ߬ߟߎ߫ ߣߕߊ߬ߣߍ߲߬ ߡߍ߲ ߞߐ߫ ߏ߬ ߘߐ߫ ߕߋ߲߬߸ ߏ߬ ߟߋ ߥߛߊ߬ߓߊ߰ߦߊ ߘߏ߫ ߟߊߘߊ߲ ߘߌ߫߸ ߊ߬ߟߎ ߘߟߊߡߌߣߊߟߌߟߊ ߟߎ߬ ߣߌ߫ ߟߞߊ߬ߙߊ߲߬ߠߌ߲ ߞߏߕߌ߯ߘߊ ߕߍ߫߸ ߛߊ߫ ߓߊ߯ߙߊ ߘߌ߫ ߢߊߝߐ߫ ߞߵߊ߬ ߟߛߊߣߌ߲ߧߊ߫، ߊ߬ ߞߵߊ߬ߟߎ߫ ߘߍ߬ߡߍ߲߬ ߛߍߣߍ߲߬ߛߊ߫ ߞߵߊ߬ <<ߜߌ߬ߙߌ߲߬ߘߌ߬.>>

ߝߘߏ߬ߓߊ߬ ߞߙߏߝߏ ߞߊ߲߫ ߌߞߐ߫߸ ߞߏ߫ ߊ߬ߟߎ߬ ߓߘߊ߫ ߛߋ߫ ߖߊ߬ߕߋ߬ߛߎ߬ߓߐ߫ ߞߎ߲߬ߝߟߐ ߘߏ߫ ߞߍ߫ ߟߊ߫߸ ߏ߬ ߞߐߝߟߌ ߘߐ߫߸ ߊ߬ߟߎ߫ ߒߞߏ ߞߊߙߊ߲ߘߋ߲߫ ߡߐ߰ ߂߄ ߇߅߂ ߟߋ߬ ߖߊ߬ߕߋ ߟߐ߲߫ ߡߎߣߎ߲߬߸ ߛߙߍߘߍ߫ ߝߟߐ ߣߌ߲߬ ߘߐ߫߸ ߡߛߏ߬ ߇ ߀߂߁߸ ߊ߬ ߣߌ߫ ߗߍ߬ ߁߇ ߇߃߁߸ ߏ߬ %߄߀ ߓߍ߯ ߦߋ߫ ߓߟߐߟߐ߫ ߞߊߙߊ߲ߕߊ ߟߎ߫ ߟߋ߬ ߘߌ߫ ߥߎߟߊߟߊ߫. ߒߞߏ ߞߊߙߊ߲ߘߋ߲ ߠߎ߬ ߦߙߌߞߊ ߟߋ߬ ߕߋ߲߬߸ ߒߞߏ ߞߊߙߊ߲ߠߊ ߟߎ߬ ߕߍ߫ ߘߋ߬.

ߒߞߏ ߝߘߏ߬ߓߊ߬ ߞߙߏߝߏ ߞߊ߬ ߝߘߏ߬ߓߊ߬ ߞߟߌߟߌ ߞߍ߫: << ߒ߬ ߧߋ߫ ߝߏ߬ߟߌ ߣߌ߫ ߞߟߌߟߌ ߟߐ߬ ߟߊ߫ ߒߞߏ ߞߟߊ߬ߘߏ߲ߛߏ ߟߎ߬ ߣߴߊ߬ ߕߌߙߌ߲ߠߌ߲ߠߊ ߟߎ߬ ߣߴߊ߬ ߥߊߟߌߝߊ ߟߎ߫ ߡߊ߬ ߟ ߊ߬ߟߎ߬ ߦߋ߫ ߞߊ߬ߟߊ ߢߊߕߟߌߡߌ߲߫ ߟߐ߲ߞߏ ߟߊ߫ (ߛߌߦߊ߲ߛ) ߸ ߛߋߒߞߏߟߦߊ ߟߊ߫ (ߕߍߞߑߣߌߞ) ߊ߬ ߣߌ߫ ߛߋߒߞߏߟߊߘߐߦߊ ߟߊ߫ (ߕߍߞߑߣߟߏߖ߭ߌ).>>

ߟߊ߬ߛߋ߬ߟߌ ߟߊߓߊ߲߫ ߘߊ߫ ߘߎ߬ߥߊ߬ߥߎ ߟߋ߬ ߡߊ߬߸ ߞߏ߫ ߊߟߊߓߍ߫ ߛߊ߲߬ߘߐ߫ ߞߏ߲ߓߌߕߌ߮ ߕߋ߬ߟߋ߫ ߂ ߦߴߊ߬ ߛߐ߬ߘߐ߲߬߸ << ߒߞߏ ߦߋ߫ ߞߊ߬ߙߊ߲߬ ߠߊ߫ ߞߊ߬ߙߊ߲߬ߕߊ ߓߍ߯ ߞߣߐ߫.>> ߖߡߊ߬ߣߊ ߝߊ߲߭ ߓߍ߯ ߘߐ߫.