ߒߞߏ ߛߍ߲ߓߊ߫ ߟߊ߫ ߛߌ߲ߡߌ߲߫ ߞߊ߲߫ ߞߊߙߊ߲ ߓߋߟߋ߲ߠߊ߸ ߊߓߌߖߊ߲߬ ߜߊ߬ߙߊ ߘߐ߫
ߣߌ߲߬ ߦߋ߫ ߒߞߏ ߛߍ߲ߓߊ߫ ߟߊ߫ ߓߋߟߋ߲ߠߊ߫ ߞߍߣߍ߲ ߠߋ߬ ߘߌ߫ ߒߞߏ ߟߊ߫ ߡߊ߲߬ߕߏ߲߬ ߜߙߊ ߘߐ߫ ߊߓߌߖߊ߲߬
ߛߟߊߕߌ߮ ߣߌ߫ ߓߐ߬ߟߐ߲߬ߞߊ ߟߎ߬߸ ߞߟߌߣߍ߲߫ ߞߙߍߞߙߍߣߍ߲ ߠߎ߬߸ ߜߊ߬ߙߊ ߛߌ߲߬ߝߏ߲߬ߧߊ߬ߓߊ߮ ߟߎ߬߸ ߕߐ߲߫ ߡߊߞߟߌߣߍ߲ ߠߎ߬߸ ߊߟߎ߫ ߓߍ߯ ߓߏ߲߬ߧߊ߬ ߦߋ߫ ߞߎߡߊ ߘߐ߫߸ ߒߞߏ ߓߊߞߋߟߋ߲ߧߊ ߞߎߡߊ ߟߋ߬.
ߌ ߓߊ߯ ߞߎߡߊ ߦߋ߫ ߒ ߘߊ߫ ߊߟߎ߫ ߕߍ߰ߟߊ߫ ߊߓߌߖߊ߲߬ ߞߣߐ߫ ߦߊ߲߬ ߓߌ߬߸ ߏ߬ ߞߎ߲߭ ߦߋ߫ ߛߙߊ߬ߒ߬ߞߊ߲߬ߠߊ ߘߏ߫ ߟߎ߫ ߟߋ߬ ߟߊߛߋ ߘߌ߫߸ ߞߊ߬ ߝߘߊ߫ ߒߞߏ ߛߍ߲ߓߊ߫ ߣߌ߫ ߒߞߏ ߝߘߏ߬ߓߊ߬ ߞߙߏߝߏ ߟߊ߫، ߞߵߏ߬ ߞߎ߲߭ ߞߍ߫ ߞߘߎ߬ߛߌ߰ߒ߬ߞߊ߲߬ߠߊ ߘߏ߫ ߟߎ߫ ߘߌ߫߸ ߊ߲ ߡߌ߬ߙߌ߲߬ߘߌ ߟߊ߫ ߛߌߣߌ߲߫ ߣߊ߬ߕߐ ߞߎ߬ߘߎ ߡߍ߲ ߦߴߊ߲ ߞߊ߲ߠߊ߫߸ ߊ߲ ߠߊ߫ ߟߐ߲ߠߌ߲ߦߊ ߟߎ߬ ߛߌߣߌ߲ߡߊ ߞߎ߬ߘߎ ߡߍ߲ ߦߴߊ߲ ߞߊ߲ߠߊ߫߸ ߊ߬ ߣߴߊ߲ ߠߊ߫ ߟߐ߲ߞߏ߫ ߞߘߐ߫ ߕߣߐ߬ߡߊ ߟߎ߬ ߞߊ߬ߙߊ߲ ߣߴߊ߬ߟߎ߬ ߢߊߦߋ ߞߎ߬ߘߎ ߡߍ߲ ߦߋ߫ ߒ߬ ߞߊ߲ߠߊ߫߸ ߊ߬ ߣߴߊ߲ ߛߌ߲ߡߌ߲߫ ߞߊ߲ ߠߎ߬ ߘߌ߫ ߝߊ߰ߡߎ߲߬ ߓߍ߯ ߟߊߘߍ߬ߣߍ߲ ߓߟߏ߫ ߢߊ ߡߍ߲ ߡߊ߬.
ߛߟߊߕߌ߮ ߣߌ߫ ߓߐ߬ߟߐ߲߬ߞߊ ߟߎ߬߸ ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߦߋ߫ ߕߐ߲߫ ߛߌߦߊߡߊ߲߫ ߝߙߊ߬ߣߍ߲ ߠߋ߬ ߘߌ߫ ߢߐ߲߮ ߞߊ߲߬ ߖߌ߬ߣߍ߬ ߜߍߞߊ߲ߠߊ ߘߐ߫߸ ߡߍ߲ ߘߍ߭ ߟߎ߬ ߦߙߌߞߊ ߦߋ߫ ߕߊ߲߫ ߣߌ߫ ߞߐ߫ ߘߌ߫، ߒߞߏ ߝߘߏ߬ߓߊ߬ ߞߙߏߝߏ ߡߍ߲ ߝߣߊ߫ ߦߋ߫ ߒߞߏ ߟߊ߫ ߝߘߏ߬ߓߊ߬ ߞߏ ߟߎ߫ ߓߌ߬ߟߊ߬ߢߐ߲߰ߡߊ ߞߙߏ߬ߝߏ߬ߓߊ߫ ߝߊ߬ߛߏ߬ߟߊ߬ߞߊ ߘߌ߫ ߖߌ߬ߣߍ߬ ߞߣߐ߫߸ ߏ߬ ߟߎ߬ ߓߍ߯ ߟߋ߬ ߣߐ߬ ߊ߬ߟߎ߬ ߞߙߊ ߝߊ߬ߟߋ߲߬ ߠߊ߫ ߒߠߋ ߘߊߣߍ߲߫ ߡߊߣߐ߯ߣߍ߲ ߠߊ߫߸ ߞߏ߫ ߒ ߧߋ߫ ߣߊ߬ ߘߏ߫ ߝߐ߫ ߛߌ߲ߡߌ߲߫ ߞߊ߲߫ ߞߏ ߞߊ߲߬ ߒ.ߥ.ߛ.ߖ ߟߊ߫ ߜߙߊ߬ ߤߏߞߌ ߣߌ߲߬ ߘߐ߫، ߞߊ߬ ߣߊ߬ ߘߐ߬ߝߐ ߟߊߛߙߋߦߊ߫߸ ߊ߬ ߝߐ ߘߐ߫ ߞߏ߫ ߒߞߏ ߘߏ߲߬ߞߏ ߟߎ߬ ߦߋ߫ ߛߌߣߌ߲ߦߋߟߊ ߟߎ߫ ߟߋ߬ ߘߌ߫، ߏ߬ ߟߋ ߘߐ߫߸ ߊ߲ ߧߋ߫ ߞߐ߲߰ ߠߊ߫ ߞߏ ߓߍ߯ ߡߊ߬.
ߌ ߓߊ߯ ߞߊ߲ ߡߊߝߟߍ߫߸ ߓߊߘߋ߲߫ ߗߍ߬ߡߊ߲ ߣߌ߫ ߡߛߏ߬ߡߊ߲ ߠߎ߬߸ ߞߊ߲ ߕߍ߫ ߓߌ߬ߟߊ߬ߢߐ߲߰ߡߊ߬ ߝߋ߲ ߘߐߙߐ߲߫ ߘߌ߫ ߘߋ߬߸ ߊ߬ ߟߐ߲ߓߊߟߌ ߟߎ߬ ߞߎߡߊ߫ ߞߊ߲ ߠߵߏ߬ ߘߌ߫، ߞߊ߲ ߦߋ߫ ߦߟߌߘߐ ߟߋ߬ ߘߌ߫߸ ߡߐ߱ ߡߊߟߐ߲߫ ߕߙߎ ߟߋ߬߸ ߡߙߌߦߊ ߟߎ߬ ߦߋ߫ ߞߍ߫ ߟߊ߫ ߞߊ߲ ߞߊ߲߬ߞߌ߬ߙߊ߬ߓߊ ߟߋ߬ ߘߐ߫߸ ߊ߬ߟߋ ߟߋ߬ ߊ߲ ߠߊ߫ ߟߐ߲ߠߌ߲ ߠߎ߬ ߣߴߊ߲ ߠߊ߫ ߥߘߋ߬ߥߘߋ߬ߦߊ ߟߎ߬ ߓߍ߯ ߟߊߡߊ߲߬ߘߌ߬ ߓߘߐ ߘߌ߫، ߛߌ߲ߡߌ߲߫ ߞߊ߲ ߠߋ߬ ߡߍ߲ߞߊ߲߫ ߝߟߐߝߟߐ ߘߌ߫߸ ߘߋ߲ߣߍ߲ ߕߟߏ ߦߋ߫ ߡߍ߲ ߡߍ߲߫ ߠߊ߫ ߛߌ߲ ߡߌ߲߬ ߕߎߡߊ ߟߊ߫، ߊ߬ߟߋ ߟߋ߬ ߘߏߞߊ߲߫ ߝߟߐߝߟߐ ߘߌ߫߸ ߊ߬ ߦߋ߫ ߘߎߢߊ߫ ߟߊߞߊ߬ ߟߊ߫ ߡߍ߲ ߠߊ߫، ߛߌ߲ߡߌ߲߫ ߞߊ߲ ߠߋ߬ ߜߎ ߦߋ߫ ߡߌ߬ߙߌ߲߬ߘߌ ߟߊ߫ ߖߘߍ߬ ߦߋ ߣߌߘߐ ߘߌ߫.
ߊ߲ ߣߐ߬ ߟߐ߲ߠߌ߲ ߓߏ߲߬ߘߏ߲ ߡߍ߲ ߠߎ߬ ߕߊ߬ ߟߊ߫ ߓߋ߲ߓߊ ߟߎ߬ ߗߍ ߘߐ߫߸ ߟߐ߲ߠߌ߲ߦߊ ߣߌ߫ ߡߟߋߞߎߦߊ ߘߐ߫߸ ߘߐ߬ߝߐ ߣߌ߫ ߛߊ߲߬ߘߊ ߟߎ߬ ߣߌ߫ ߕߏ߬ߟߌ ߟߎ߬ ߘߐ߫߸ ߏ߬ ߟߎ߬ ߢߊߝߐ߫ ߘߴߊ߲ ߧߋ߫ ߊ߲ ߠߊ߫ ߞߊ߲ ߠߋ߬ ߘߐ߫، ߊ߬ ߞߎߡߊߘߋ߲ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߦߋ߫ ߥߘߋ߬ߥߘߋ߬ߟߌ ߟߋ߬ ߘߌ߫߸ ߊ߬ ߞߎߡߦߊ ߓߍ߯ ߦߋ߫ ߘߎߢߊ߫ ߦߋߝߊߘߌ ߦߌ߬ߘߊ߬ߟߊ߲ ߠߋ߬ ߘߌ߫، ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫߸ ߛߓߍߛߎ߲߫ ߛߌ߲ߘߌ ߝߊ߬߸ ߊ߬ߟߋ ߞߵߊ߬ ߢߊߦߋ߫ ߟߋ߬ ߖߏߣߊ߫߸ ߞߏ߫ ߡߌ߬ߙߌ߲߬ߘߌ ߡߍ߲ ߞߊ߲ ߕߍ߫ ߛߓߍ߫ ߟߊ߫߸ ߏ߬ ߦߋ߫ ߥߛߎ ߟߋ߬ ߟߊ߫߸ ߥߛߎ߫ ߜߘߍ߫ ߘߏ߲߬ ߕߍ߫߸ ߞߊ߬ ߝߎ߯ߘߌ ߞߍ߫ ߊ߬ ߟߊ߫ ߘߐ߬ߝߐ߫ ߕߎ߬ߢߊ߬ߡߊ ߟߎ߫ ߞߊ߲߬، ߏ߬ ߟߋ ߞߏߛߐ߲߬߸ ߊ߬ ߞߊ߬ ߞߊ߬ߟߊ ߕߊ߬ ߞߊ߬ ߡߊ߲߬ߘߋ߲߬ ߟߊߦߋߟߋ߲ߧߊ߫ ߘߝߐ߬ ߥߊߚߊߕߊߕߊ ߟߎ߬ ߟߊ߫.
ߊ߲ ߧߴߊ߬ ߟߐ߲߫߸ ߊ߲ ߛߌ߲ߡߌ߲߫ ߞߊ߲ ߠߎ߬ ߦߋ߫ ߓߎߙߎ߲ߞߐ߫ ߟߊ߫ ߢߊ ߡߍ߲߸ ߊ߲ ߤߊߞߟߌ ߣߴߊ߲ ߡߙߌ ߟߎ߬ ߝߣߊ߫ ߦߋ߫ ߕߊ߬ߡߌ߲߬ ߠߊ߫ ߓߎߙߎ߲ߞߐ߫ ߟߊ߫ ߕߋ߲߬ ߠߋ߬، ߘߋ߲ߣߍ߲ ߡߍ߲ ߠߊ߫ ߞߊ߬ߙߊ߲ ߘߊ߲߬ߣߍ߲߫ ߥߊߟߌ߫ ߞߊ߲ ߘߐߙߐ߲߫ ߡߊ߬߸ ߏ߬ ߛߋ߲߬ߞߘߐ߬ߡߊߕߍ߰ߣߍ߲߫ ߠߋ߬ ߢߣߊߡߦߊ ߣߌ߲߬ ߘߐ߫، ߓߊߏ߬߸ ߊ߬ ߦߋ߫ ߘߙߎ߬ߛߌ߬ߟߌ ߟߋ߬ ߟߊ߫߸ ߊ߬ ߕߍ߫ ߢߊߦߋߟߌ߫ ߞߍ߫ ߟߊ߫، ߊ߬ ߦߋ߫ ߟߊ߬ߘߍ߲߰ߠߌ߲ ߠߋ߬ ߞߊ߲߬߸ ߊ߬ ߕߍ߫ ߟߊ߬ߘߊ߲߬ߠߌ߲߬ ߞߍ߫ ߟߊ߫، ߡߙߌ ߡߍ߲ ߦߴߊ߬ ߟߊ߫߸ ߏ߬ ߟߐ߲ߠߌ߲߫ ߕߴߊ߬ ߟߊ߫، ߟߐ߲ߠߌ߲ ߡߍ߲ ߦߴߊ߬ ߟߊ߫߸ ߏ߬ ߡߙߌ߫ ߕߴߊ߬ ߟߊ߫، ߏ߬ ߦߋ߫ ߞߎ߲߬ߠߊ߬ߖߌ߰ ߞߏ߬ߓߊ߫ ߟߋ߬ ߘߌ߫߸ ߊ߬ ߦߋ߫ ߟߐ߲ߠߌ߲ߦߊ ߟߎ߬ ߓߎߙߎ߲ߞߐ߫ ߞߏߓߊ߫ ߟߋ߬ ߘߌ߫߸ ߊ߬ ߖߍ߬ߘߍ ߜߎ ߦߋ߫ ߓߊ߲߬ߒ߬ߖߘߍ߬ߘߐ ߟߋ߬ ߘߌ߫.
ߊ߲ ߠߊ߫ ߞߊ߲ ߠߎ߬ ߞߊ߬ߙߊ߲߬ߓߊߟߌߦߊ߸ ߏ߬ ߦߴߊ߲ ߛߐ߲߭ ߠߋ߬ ߘߌ߫ ߊ߲ ߓߘߊ߫ ߟߐ߲ߠߌ߲ ߠߎ߬ ߟߊߕߎߣߎ߲ ߡߊ߬߸ ߞߵߊ߲ ߠߊ߫ ߛߊ߲߬ߘߊ ߟߎ߬ ߟߊߕߎߣߎ߲߫߸ ߞߵߊ߲ ߠߊ߫ ߓߊߛߌߦߊ ߟߎ߬ ߘߏ߲߬ ߓߐ߰ ߟߊ߫߸ ߞߵߊ߲ ߠߊ߫ ߕߏ߬ߟߌ߬ ߢߌߡߊ ߟߎ߬ ߣߴߊ߲ ߠߊ߫ ߘߝߐ߬ ߓߘߍ ߟߎ߬ ߞߍ߫ ߛߊ߬ߝߋ߲ ߘߌ߫، ߞߵߊ߲ ߝߊ߰ ߖߌ߫ ߟߐ߮ ߡߊ߬߸ ߞߵߊ߬ ߛߐ߬ߘߐ߲߬ ߊ߲ ߧߋ߫ ߞߐ߬ߟߐ߲߬ ߞߊ߲ ߠߊ߫߸ ߓߊ߬ߙߵߊ߬ ߘߊߕߎ߲߲߯ߣߍ߲߫.
ߊ߲ ߧߋ߫ ߕߎ߬ߢߊ߬ ߜߍ ߝߐ߫ ߢߐ߲߮ ߦߋ߫߸ ߞߊ߲߫ ߜߘߍ߫ ߞߊߙߊ߲ ߡߊ߲߫ ߖߎ߯، ߓߊ߬ߙߌ߬ ߣߌ߫ ߞߊ߲߫ ߜߘߍ ߏ߬ ߟߋ ߞߍ߫ ߘߊ߫ ߛߋߒߠߊ ߡߊ߬ߙߌ߬ߝߊ߬ ߓߘߎ ߘߌ߫߸ ߊ߬ ߦߴߊ߲ ߓߘߊ ߘߐߞߏߟߏ߲ߧߊ߫ ߟߊ߫ ߟߐ߲ߠߌ߲ ߠߊ߫ ߟߋ߬، ߓߌ߬ߡߊ߫ ߝߘߊ߬ߝߌ߲߬ߠߊ߫ ߓߌ߬ߟߊ߫ ߡߊ߬ߜߏ߬ߙߏ߲߬ߞߊ߬ߟߌ ߘߏ߫ ߘߐ߫: ߊ߲ ߘߋ߲ ߠߎ߬ ߕߍ߫ ߞߘߐߓߐ߫ ߟߴߊ߬ߟߎ߬ ߞߎ߲߬ ߘߐ߬ ߟߐ߲ߠߌ߲ ߡߊ߬ ߘߋ߬߸ ߓߊ߬ߙߵߊ߬ߟߎ߬ ߦߋ߫ ߛߋ߫ ߟߊ߫ ߞߊ߲߫ ߛߌ߲ߞߊߣߍ߲ ߞߎߡߊ ߟߎ߬ ߘߊߛߊ߬ߦߌߛߊ߬ߦߌ߬ ߟߊ߫ ߢߊ ߡߍ߲߸ ߊ߬ߟߎ߬ ߦߋ߫ ߞߘߐߓߐ߫ ߟߴߏ߬ ߟߋ ߟߊ߫، ߊ߲ ߞߊ߫ ߞߊ߲߫ ߞߊ߬ ߞߍߢߊ ߏ߬ ߟߋ ߦߟߍ߬ߡߊ߲߫ ߊ߬ ߢߊߓߘߍ ߡߊ߬، ߝߊ߬ߙߊ߲߬ߛߌ߬ ߞߊ߲߬ ߞߊߙߊ߲߸ ߊ߬ߜ߭ߌ߬ߟߋ߬ ߞߊ߲߬ ߞߊߙߊ߲߸ ߊߙߊߓߎ ߣߌ߫ ߛߣߌߥߊ ߟߎ߬ ߝߏߦߌ߬ ߞߊ߬ߙߊ߲ ߕߍ߫ ߖߎ߯ߡߊ߲߫ ߘߌ߫߸ ߓߊ߬ߙߵߊ߲ ߕߊ ߟߋ߬ ߞߍ ߓߟߏߞߐߝߍ߫ ߝߋ߲ ߘߌ߫ ߛߊ߫߸ ߏ߬ ߟߋ ߕߌߢߍߟߌ ߟߎ߬ ߘߐ߫ ߓߟߋ߬ߓߟߋ ߘߌ߫.
ߟߐ߲ߞߏ ߢߊߢߌߣߌ߲ߠߌ߲ ߠߎ߬ ߓߘߴߊ߬ ߦߌ߬ߘߊ߬߸ ߞߏ߫ ߡߍ߲ ߓߊ߯ ߞߊ߬ߙߊ߲ ߘߊߡߌ߬ߣߊ߬ ߛߌ߲ߡߌ߲߫ ߞߊ߲ ߘߐ߫߸ ߏ߬ ߟߋ ߤߊ߲ߞߟߌ ߦߋ߫ ߟߊߞߊ߬ ߟߊ߫߸ ߊ߬ ߟߊ߫ ߢߊߦߋߟߌ ߝߊ߲߬ߞߊ ߘߌ߫ ߥߙߊ߬، ߛߌ߲ߡߌ߲߫ ߞߊ߲ ߦߋ߫ ߛߍ߲ ߠߋ߬ ߘߌ߫ ߞߊ߬ ߘߎߢߊ߫ ߞߊ߲ ߕߐ߭ ߟߎ߬ ߟߊߛߐ߬ߘߐ߲߬، ߊ߬ߟߋ ߟߋ߬ ߜߘߌ ߘߌ߫، ߓߍ߯ ߘߏ߲߬ ߞߵߊ߬ ߟߐ߲߫ ߞߏ߫ ߓߏ߲ ߡߍ߲ ߜߘߌ ߡߊ߫ ߛߌ߰߸ ߏ߬ ߦߋ߫ ߥߎ߬ߦߊ߬ ߟߊ߫ ߟߋ߬.
ߊߟߎ߫ ߦߴߊ߬ ߡߊߝߟߍ߫ ߞߍ߬߸ ߊ߰ ߝߐ߫ ߞߏ߫ ߟߐ߲ߞߏ ߕߍ߫ ߛߋ߫ ߟߊ߫ ߞߊ߬ߙߊ߲߬ ߠߊ߫ ߒߞߏ ߘߐ߫ ߝߘߊ߬ߝߌ߲߬ߠߊ߬ ߖߊ߯ߓߘߊ ߟߎ߬ ߟߊ߫ ߡߎߣߎ߲߬߸ ߘߡߊ߬ߟߐ߲ ߕߴߛߋ߫ ߟߊ߫ ߞߊ߬ߙߊ߲߬ ߠߊ߫ ߒߞߏ ߘߐ߫ ߞߊ߬ߙߊ߲߬ߘߊ߬ߓߊ ߟߎ߬ ߟߊ߫ ߡߎߣߎ߲߬߸ ߓߊߛߌߦߊ ߕߴߛߋ߫ ߟߊ߫ ߞߊ߬ߙߊ߲߬ ߠߊ߫ ߞߎ߲߬ߠߊ߬ߛߌ߮ ߟߊ߫ ߢߍߥߟߊ ߟߎ߬ ߘߐ߫ ߒ߬ ߠߊ߫ ߞߊ߲ ߠߎ߬ ߘߐ߫ ߡߎߣߎ߲߬، ߛߋߒߞߏߟߊߘߐߦߊ ߟߎ߬ ߝߣߊ߫ ߓߍ߫ ߕߋ߲߬.
ߊ߬ ߘߏ߲߬߸ ߕߎ߬ߢߊ ߦߋ߫ ߡߍ߲ ߘߌ߫߸ ߣߴߊ߲ ߧߴߊ߬ ߝߍ߬ ߊ߲ ߡߌ߬ߙߌ߲߬ߘߌ߬ ߢߐ߲߮ ߠߎ߬ ߤߊ߲ߞߟߌ ߦߋ߫ ߓߐ߫ ߖߐ߭ ߟߊ߫߸ ߞߵߊ߲ ߡߙߌߦߊ ߟߎ߬ ߘߍ߲߫ ߊ߬ߟߎ߫ ߖߘߍ߬ ߟߊ߫߸ ߝߏ߫ ߞߏ ߟߎ߬ ߦߋ߫ ߞߍ߫ ߊ߲ ߠߊ߫ ߞߊ߲ ߠߎ߬ ߟߋ߬ ߘߐ߫.
ߊ߲ ߠߊ߫ ߗߋߦߊߟߌ ߘߊ߲߬ ߕߍ߫ ߞߊ߲ ߠߎ߬ ߟߊߕߊ߲߬ߞߊ ߘߐߙߐ߲߫ ߘߌ߫ ߘߋ߬߸ ߊ߬ ߦߋ߫ ߛߌߣߌ߲߫ ߡߞߊߘߊ߲ ߠߋ߬ ߘߌ߫، ߊ߲ ߠߊ߫ ߞߊ߲ ߠߎ߬ ߞߊ߫ ߞߊ߲߫ ߞߊ߬ ߞߍ߫ ߛߋߒߞߏߟߦߊ߫ ߞߊ߲ ߠߋ߬ ߘߌ߫߸ ߟߐ߲ߞߏ߫ ߞߊ߲ ߠߋ߬ ߘߌ߫߸ ߞߌ߬ߓߊ߬ߙߏ߬ߦߊ߬ߟߌ߬ ߞߊ߲ ߠߋ߬ ߘߌ߫، ߊ߲ ߞߊ߫ ߞߊ߲߫ ߞߊ߬ ߛߋ߫ ߟߐ߲ߞߏ ߟߎ߬ ߘߟߊߡߌ߬ߘߊ߬ ߟߊ߫߸ ߞߵߊ߬ߟߎ߬ ߛߓߍ߫߸ ߞߊ߬ ߟߊ߬ߖߍ߲߬ߛߍ߲߬ߠߌ߲ ߠߎ߬ ߞߍ߫߸ ߞߊ߬ ߛߌ߲ߘߟߌ ߟߎ߫ ߥߓߊ߬ߞߏ߬ߞߍ ߞߍ߫ ߒ߬ ߠߊ߫ ߞߊ߲ ߠߎ߬ ߘߐ߫.
ߛߟߊߕߌ߮ ߣߌ߫ ߓߐ߬ߟߐ߲߬ߞߊ ߟߎ߬߸
ߊ߲ ߠߊ߫ ߞߊ߲ ߠߎ߬ ߞߊ߬ߙߊ߲߬ߓߊߟߌߦߊ߸ ߏ߬ ߦߴߊ߲ ߘߋ߲ ߠߎ߬ ߟߊ߫ ߛߌߣߌ߲ߢߍߛߌ߮ ߛߏ߲߬ߧߊ ߟߋ߬ ߘߌ߫߸ ߞߵߊ߲ ߓߋ߲ߓߊ ߟߎ߬ ߝߣߊ߫ ߖߊ߲߬ߝߊ߬، ߊ߲ ߠߊ߫ ߞߊ߲ ߠߎ߬ ߞߊ߬ߙߊ߲߸ ߏ߬ ߦߋ߫ ߡߊ߲߬ߕߎ߬ߙߋ߬ߦߊ ߟߋ߬ ߘߌ߫߸ ߏ߬ ߦߋ߫ ߟߐ߲ߠߌ߲ ߠߎ߬ ߟߊߡߊ߬ߙߊ ߟߋ߬ ߘߌ߫߸ ߏ߬ ߦߴߊ߲ ߡߙߌߦߊ ߟߎ߬ ߞߊ߲ߠߊߓߌߟߊ ߟߋ߬ ߘߌ߫߸ ߏ߬ ߟߋ ߜߎ ߦߴߊ߲ ߠߊ߫ ߡߐ߰ߦߊ ߛߙߋ ߘߌ߫.
ߊߟߎ߫ ߦߴߊ߬ ߕߏ߫ ߒ ߧߋ߫ ߒ ߠߊ߫ ߞߎߡߊ ߣߌ߲߬ ߞߎ߲߭ߘߏ߲߬ ߝߘߊ߬ߝߌ߲߬ߠߊ߫ ߥߘߋ߬ߥߘߋ߬ߦߊ߬ ߞߊ߲߬ ߞߋߟߋ߲߫ ߠߊ߫:
<<ߡߌ߬ߙߌ߲߬ߘߌ ߡߍ߲ ߕߴߊ߬ ߟߊ߫ ߞߊ߲ ߞߊ߬ߙߊ߲߬ ߠߊ߫߸ ߏ߬ ߦߋ߫ ߟߋ߬ ߦߏ߫ ߦߙߌߖߎ ߡߍ߲ ߦߋ߫߸ ߣߌ߫ ߟߌߟߌ߲߫ ߕߴߊ߬ ߟߊ߫.>>
ߒߞߏ ߛߊߓߎ߫ ߟߊ߫߸ ߊ߲ ߠߊ߫ ߞߊ߲ ߠߎ߬ ߓߘߊ߫ ߜߊ߲ߜߊ߲߫߸ ߞߵߊ߬ߟߎ߬ ߟߊߕߊ߲߬ߞߊ߫ ߞߵߊ߬ߟߎ߬ ߞߛߌ߫ ߟߊ߬ߣߐ߮ ߡߊ߬߸ ߞߊ߬ ߝߘߊ߬ߝߌ߲߬ߠߊ߫ ߛߐ߫ ߞߎ߲߬ߠߊ߬ߦߋߙߋ߲ ߠߊ߫߸ ߞߵߊ߲ ߡߊߛߘߌ߬ ߟߐ߲ߞߏ ߣߌ߫ ߟߐ߲ߠߌ߲ߦߊ ߟߎ߬ ߟߊ߫.
ߊ߲ ߠߊ߫ ߞߎߟߎ߲ߖߋߟߌ ߝߏ߬ߟߌ߬ ߓߟߏߕߍ߰ߓߊߟߌ ߦߴߊߟߎ߫ ߦߋ߫ ߞߘߊߎ߫.
Galerie
ߛߟߏ߬ߡߣߊ߬ ߞߊ߲ߕߍ߫